Gen 27 | NdeIBE | STEP | Kwathi u-Isaka eseluphele, amehlo akhe esethundubele okokuthi wayengasaboni, wabiza u-Esawu indodana yakhe endala wathi kuye, “Ndodana yami.” Waphendula wathi, “Ngilapha.”

Genesis 27

UJakhobe Uthola Isibusiso ku-Isaka

1 Kwathi u-Isaka eseluphele, amehlo akhe esethundubele okokuthi wayengasaboni, wabiza u-Esawu indodana yakhe endala wathi kuye, “Ndodana yami.” Waphendula wathi, “Ngilapha.”

2 U-Isaka wathi, “Manje sengilixhegu, yikho kangilazi ilanga lokufa kwami. 3 Thatha izikhali zakho – umxhaka wemitshoko ledandili lakho – ungene iganga uyengizingelela inyamazana.

4 Ungilungisele ukudla okumnandi engikukhwabithayo ukulethe kimi lapha ngidle, ukuze ngikuphe isibusiso sami ngingakafi.”

5 URabheka wayelalele u-Isaka ekhuluma lendodana yakhe u-Esawu. Kwathi u-Esawu esephumile waya egangeni ukuyazingela inyamazana ukuze ayilethe, 6 uRabheka wathi endodaneni yakhe uJakhobe, “Khangela, ngizwe uyihlo esithi kumnewenu u-Esawu 7 ‘Ngilethela inyamazana ungilungisele ukudla okumnandi ngidle, ukuze ngikuphe isibusiso sami phambi kukaJehova ngingakafi.’ 8 Manje-ke lalela kuhle, ndodana yami, wenze lokho engikutshela khona: 9 Yana emhlambini ulethe lapha kimi amazinyane embuzi amabili anonileyo, ukuze ngilungisele uyihlo ukudla okumnandi ngendlela akufuna ngayo. 10 Wena ubusukusa kuyihlo adle, abesekunika isibusiso sakhe engakafi.”

11 UJakhobe wathi kuRabheka unina, “Kodwa umnewethu u-Esawu lihwanqa, mina ngingumswelaboya. 12 Pho ubaba angangithintake? Kuzabonakala ukuthi ngiyamqila ngibe sengizehlisele isethuko phezu kwami esikhundleni sesibusiso.”

13 Unina wathi kuye, “Ndodana yami, lesosethuko kasehlele kimi. Wena yenza lokho engikutshela khona kuphela; hamba uyongithathela wona.”

14 Yikho wahamba wayawathatha wawaletha kunina, yena walungisa ukudla okumnandi, ngaleyondlela eyayithandwa nguyise. 15 Yikho uRabheka wasethatha izigqoko ezaziyizo zoqobo ezika-Esawu indodana yakhe endala, lezo ezazikhona endlini, wazigqokisa indodana yakhe encane, uJakhobe. 16 Wabuya wamgoqela izandla zakhe lentamo lapho okwakubutshelezi khona ngesikhumba sembuzi. 17 Waseqhubela indodana yakhe uJakhobe ukudla lokho okumnandi kanye lesinkwa ayesenzile.

18 Waya kuyise wafika wathi, “Baba.” Wasabela wathi, “Yebo, ndodana yami. Ngubani?”

19 UJakhobe wathi kuyise, “Ngingu-Esawu izibulo lakho. Sengenzile njengokungilayela kwakho. Vuka uhlale udle inyama yami yenyamazana ukuze ungiphe isibusiso sakho.”

20 U-Isaka wayibuza indodana yakhe wathi, “Uyizuze njani masinyane kangaka, ndodana yami?” Waphendula wathi, “UJehova uNkulunkulu wakho ungiphumelelisile.”

21 U-Isaka wasesithi kuJakhobe, “Sondela eduze ngikuthinte, ndodana yami, ukuze ngazi ngempela ukuthi uyiyo indodana yami u-Esawu noma hatshi.”

22 UJakhobe wasondela kuyise u-Isaka wamthinta wathi, “Ilizwi liyilizwi likaJakhobe, kodwa izandla yizandla zika-Esawu.” 23 Kazange amazi ngoba izandla zakhe zaziloboya njengezikamnewabo u-Esawu; ngakho wambusisa. 24 Wabuza wathi, “Kambe unguye na u-Esawu indodana yami?” Waphendula wathi, “Nginguye.”

25 Wasesithi, “Ndodana yami, ngipha inyama yakho yenyamazana ngidle, ukuze ngikuphe isibusiso sami.” UJakhobe wamupha wadla; waletha lewayini wanatha. 26 Uyise u-Isaka wathi kuye, “Woza lapha, ndodana yami, ungange.”

27 Wasesiya kuye wamanga. Kwathi u-Isaka esezwile iphunga lezigqoko zakhe, wambusisa wathi, “Yeka, iphunga lendodana yami linjengephunga lensimu ayibusisileyo uJehova.

28 Sengathi uNkulunkulu angakupha amazolo asezulwini lokuvunda komhlabathi – inala yamabele lewayini elitsha.

29 Sengathi izizwe zingakukhonza labantu bakhothamele kuwe. Sengathi labo abakuqalekisayo bangaqalekiswa lalabo abakubusisayo babusiswe.”

30 U-Isaka eseqedile ukumbusisa njalo uJakhobe esathi uyasuka kuyise, umnewabo u-Esawu wabe engena evela zingela. 31 Laye njalo walungisa ukudla okumnandi wakuletha kuyise. Wasesithi kuye, “Baba, vuka udle inyama yami yenyamazana, ukuze ungiphe isibusiso sakho.”

32 Uyise u-Isaka wambuza wathi, “Ungubani wena?” Waphendula wathi, “Ngiyindodana yakho, izibulo lakho u-Esawu.”

33 U-Isaka wathuthumela kakhulu wathi, “Kanti ubengubani ozingele inyamazana wayiletha kimi? Ngiyidlile khathesi nje usuzafika, ngambusisa – yebo kambe ngempela nguye ozabusiswa!”

34 Kwathi u-Esawu ewezwa amazwi kayise waqhunsuka wakhala kakhulu okubuhlungu wathi kuyise, “Ngibusisa lami njalo, baba!”

35 Kodwa wathi, “Umfowenu uze ngobuqili wathatha isibusiso sakho.”

36 U-Esawu wathi, “Kakumfanelanga na ukuthiwa nguJakhobe? Usengiqilile lezi izibanga ezimbili: Wathatha ubuzibulo bami, manje usethethe isibusiso sami?” Wasebuza wathi, “Kawungigcinelanga yini mina esinye isibusiso”?

37 U-Isaka wamphendula u-Esawu wathi, “Sengimenze waba yinkosi phezu kwakho, ngenza zonke izihlobo zakhe zaba yizichaka zakhe, njalo ngamsekela ngenala langewayini elitsha. Kambe ngingabe ngisakwenzelani, ndodana yami?”

38 U-Esawu wathi kuyise, “Kanti ulesibusiso esisodwa kuphela na baba? Ngibusisa lami, baba!” U-Esawu wasekhala kakhulu ephumisela.

39 Uyise u-Isaka wamphendula wathi, “Umuzi wakho uzakuba khatshana lokuvunda komhlaba khatshana lamazolo asezulwini eliphezulu.

40 Uzaphila ngokusebenzisa inkemba njalo uzamkhonza umfowenu. Kodwa kuzakuthi lapho usudlubulunda, uzalilahla ijogwe lakhe lisuke entanyeni yakho.”

UJakhobe Ubalekela kuLabani

41 U-Esawu wagcina isikhwili ngoJakhobe ngenxa yesibusiso uyise ayemuphe sona. Wazitshela wathi, “Izinsuku zokulilela ubaba seziseduze; lapho-ke ngizambulala umfowethu uJakhobe.”

42 Kwathi uRabheka esezwile okwakutshiwo yindodana yakhe endala u-Esawu, wabiza indodana yakhe encinyane uJakhobe wathi kuye, “Umnewenu u-Esawu uziduduza ngomcabango wokuthi akubulale. 43 Yikho-ke wena ndodana yami, yenza lokho engikutshela khona: Baleka masinyane uye kumnewethu uLabani eHarani. 44 Uhlale khonale ulaka lukamnewenu luze lubohle. 45 Kuzakuthi nxa umnewenu engasakuzondelanga esekhohliwe ukuthi kuyini owakwenzayo kuye, ngizathumela ilizwi ukuthi ubuye usuka khonale. Kambe kungaba yini ukuthi ngilahlekelwe yini lobabili ngasuku lunye na?”

46 URabheka wasesithi ku-Isaka, “Impilo iyanginenga ngenxa yabafazi bamaHithi laba. Nxa uJakhobe engathatha umfazi kulaba abafazi balelilizwe, abafazi abanje bamaHithi, impilo yami iyabe ingasangifanelanga.”